ᐅᖃᒪᔭᐅᑎᓂᖅ
ᓈᓚᖕᓂᕐᓗ
ᐅᖃᒪᔭᒐᔪᓪᓗᓯ
ᐅᖃᕈᓐᓇᖅᓯᓲᖑᕗᒍᑦ ᐅᖃᒪᔭᒃᐸᒃᑐᑕ. ᓈᓚᑦᑎᐊᖃᑦᑕᕈᒃ ᕿᑐᕐᖓᐃᑦ ᐅᖃᓪᓚᐅᑎᖃᖅᑎᓪᓗᒍ ᐃᓱᒪᒋᔭᖏᓐᓂᒃ ᐅᓂᒃᑳᖅᑕᖏᑕᓗ ᐃᓚᖏᓐᓂᒃ ᐅᓂᒃᑲᐅᑎᕙᒡᓗᒍ. ᐃᓕᓐᓂᐊᒃᑭᑦ ᐱᒃᑯᒋᔭᖏᑦ ᐊᒻᒪᓗ ᐱᓕᕆᐊᕆᔪᒪᔭᖏᑦ. ᐃᓱᒪᒋᔭᖏᓐᓂᒃ ᐊᐱᖅᓱᖃᑦᑕᒃᑭᑦ ᐅᓪᓗᒥᓗ ᖃᓄᐃᓕᐅᖅᑲᐅᖕᒪᖔᑕ ᓈᓚᑦᑎᐊᖅᐸᒡᓗᒋᓪᓗ ᑭᒡᒍᑎᒋᔭᖏᑦ. ᐃᓚᓯ ᖃᓄᐃᓕᐅᕐᓂᕆᓯᒪᔭᖏᓐᓂᒃ ᐅᓂᒃᑲᐅᑎᖃᑦᑕᕈᒃ ᐅᓪᓗᒥᓘᓐᓃᑦ ᐊᑐᖅᑲᐅᔭᑦᓯᓐᓂᒃ. ᑐᓵᖃᑦᑕᖅᐸᑕ ᐅᖃᓪᓚᖃᑦᑕᖅᐸᑕᓗ ᐃᓄᒃᑐᑦ, ᐃᓕᑉᐸᓪᓕᐊᓂᖅᓴᐅᓂᐊᖅᑐᑦ.
ᐱᙳᐊᕐᓂᒃᑯᑦ ᐃᓕᓐᓂᐊᕐᓂᖅ
ᐃᓕᓐᓂᐊᕐᓂᖅ ᐅᖃᐅᓯᓕᕆᓂᕐᒥᒃ ᐱᙳᐊᕐᓂᒃᑰᕈᓐᓇᖅᐳᖅ! ᐱᙳᐊᖅᑕᐅᒐᔪᒃᑐᑦ ᒪᑯᐊ “ᑕᐅᑐᖅᐳᖓ” ᐊᒻᒪᓗ “20-ᓂᒃ ᐊᐱᖅᓱᕐᓂᖅ” ᐅᖃᓪᓚᒋᐅᖅᓴᔾᔪᑎᑦᑎᐊᕙᐅᕗᑦ ᐊᒻᒪᓗ ᐃᓱᒪᓕᐅᕈᓐᓇᕐᓂᕐᒥᒃ ᑯᑦᑕᖅᑕᙱᑦᑐᒥᒃ ᐃᓄᒃᑐᑦ. ᕿᑐᕐᖓᕕᑦ ᖁᕕᐊᒋᔭᖏᑦ ᐊᑐᕈᓐᓇᖅᐸᑎᑦ ᐅᖃᕆᐅᖅᓴᓂᕐᒧᑦ ᐱᙳᐊᕈᑎᓂᒃ!
ᓈᓚᖃᑎᒌᖕᓂᖅ ᐃᙱᒐᕐᓂᒃ
ᓱᕈᓯᕐᓄᑦ ᐃᙱᒐᑦ ᐊᐅᓚᓂᖏᒍ ᒧᒥᕐᓂᖅ ᐃᙱᖃᑎᒌᖕᓂᕐᓗ ᐃᓕᓐᓂᐊᕈᑕᐅᔪᓐᓇᖅᐳᑦ ᐅᖃᐅᓯᓕᕆᓂᕐᒥᒃ! ᐃᓄᒃᑎᑐᑦ ᐃᙱᒐᕐᓂᒃ ᓈᓚᖃᑦᑕᕆᑦᓯ, ᐃᓚᓯᓗ ᐱᓯᖏᓐᓂᒃ, ᐊᒻᒪᓗ ᐅᖃᓗᕋᐅᔭᖃᑎᒋᒍᓐᓇᕆᕙᑦ. ᑕᒪᒃᑯᐊ ᐃᙱᒐᑦ ᐃᓄᐃᑦ ᐱᖅᑯᓯᖏᓐᓄᑦ ᐊᑕᕗᑦ ᐊᒻᒪᓗ ᖁᕕᐊᓇᖅᐳᑦ ᐅᖃᐅᓯᕐᒥᒃ ᐃᓕᓐᓂᐊᕐᓗᓂ.
ᓈᓚᖃᑦᑕᕐᓂᖅ ᓈᓚᐅᑎᒥᒃ ᖃᕆᓴᐅᔭᒃᑯᓪᓗ ᓈᓚᒐᕐᓂᒃ
ᖃᓂᒌᑦᑎᐊᓕᕐᕕᒃᓴᐅᕗᖅ ᓈᓚᖃᑎᖃᖅᐸᒡᓗᓂ ᕿᑐᕐᖓᕐᓂᒃ ᐃᓄᒃᑐᑦ ᓈᓚᐅᑎᒥᒃ ᖃᕆᓴᐅᔭᒃᑯᓪᓗ ᓈᓚᒐᕐᓂᒃ. ᑕᐃᒫᒃ ᓈᓚᖃᑎᒌᒃᐸᒡᓗᓂ ᐱᕕᒃᓴᖃᕐᓂᐅᕗᖅ ᐅᖃᒪᔭᐅᑎᖃᕐᓂᕐᒧᑦ ᐊᒻᒪᓗ ᕿᑐᕐᖓᕐᓄᑦ ᐃᓕᓐᓂᐊᕈᑎᑦᑎᐊᕙᐅᕗᖅ ᐅᖃᐅᓯᑦ ᑐᑭᖏᓐᓂᒃ ᑐᓴᕆᐅᖅᑕᖏᓐᓂᒃ, ᐊᒻᒪᓗ ᐅᖃᓪᓚᒍᓰᑦ ᐊᔾᔨᒌᙱᓐᓂᖏᓐᓂᒃ.
ᐱᓪᓚᑦᑖᙳᐊᕐᓂᖅ
ᐅᖃᓕᒫᕆᐅᖅᓴᓂᕐᒥᒃ ᐃᓕᓐᓂᐊᕈᓐᓇᖅᐳᓯ ᐅᓂᒃᑳᖏᓐᓂᒃ ᐅᖃᓕᒫᒐᐅᑉ ᐊᑐᕐᓗᓯ ᐱᓪᓚᑦᑖᙳᐊᕐᓗᓯ. ᑕᐃᒫᒃ ᐅᓂᒃᑳᑦ ᐃᑉᐱᖕᓇᖅᓯᑦᑎᐊᓲᖑᕗᑦ, ᐃᑲᔪᕈᓐᓇᖅᐳᓪᓗ ᑐᑭᓯᐅᒪᓕᕐᓂᖓᓄᑦ, ᐊᒻᒪ ᓇᓗᖅᑯᑎᒍᓐᓃᕈᑕᐅᔪᓐᓇᖅᐳᑦ ᕿᑐᕐᖓᕐᓄᑦ ᐃᓄᒃᑐᑦ ᐅᖃᑦᑎᐊᕈᓐᓇᕐᓂᖏᓐᓄᑦ.
ᐅᓂᒃᑳᖃᑦᑕᕐᓂᖅ
ᐅᓂᒃᑳᓄᑦ ᐊᐅᓚᔾᔭᒃᑕᐅᔪᓐᓇᖅᐳᖅ ᕿᑐᕐᖓᕕᑦ ᑕᑯᓐᓇᙳᐊᕈᓐᓇᕐᓂᖓᓄᑦ! ᐃᓚᑦᓯᓐᓄᑦ ᐊᑐᖅᑕᐅᓯᒪᔪᑦ ᐅᕝᕙᓘᓐᓃᑦ ᓯᓐᓇᒃᓴᐅᑎᓂᒃ ᐅᓂᒃᑳᑦ, ᑕᒪᒃᑯᐊ ᕿᑐᕐᖓᕐᓂᒃ ᐃᑲᔪᕈᓐᓇᖅᐳᑦ ᐅᖃᕈᓐᓇᖅᓯᕙᓪᓕᐊᓂᖓᓄᑦ ᓂᓪᓕᐊᒍᓐᓇᕐᓂᖏᓐᓄᓪᓗ ᐃᓄᒃᑐᑦ.