ᐱᓕᕆᐊᕆᖃᑦᑕᕐᓂᐊᖅᑕᑦᓯᓐᓂᒃ ᓂᕆᐅᓇᖅᓯᑎᑦᑎᓗᓂ ᐃᑲᔫᑎᖃᕈᓐᓇᖅᐳᖅ ᕿᑐᕐᖓᑦᓯᓐᓄᑦ ᑐᑭᓯᐅᒪᓕᕐᓗᓂ ᖃᓄᐃᓕᐅᕋᓱᖕᒪᖔᑦᓯ. ᐅᖃᓪᓚᖃᑎᒋᕙᒡᓗᒋᑦ ᐅᓪᓗᒥ ᑭᓱᓕᕆᓂᐊᕐᒪᖔᑦᓯ ᐅᕝᕙᓘᓐᓃᑦ ᐱᓕᕆᐊᒃᓴᑦᓯᓐᓂᒃ ᐱᐊᓂᒃᐸᓪᓕᐊᔪᓂᒃ ᑎᑎᖅᐸᓪᓕᐊᔪᓐᓇᖅᐸᓯ. ᐱᒋᐊᕈᑎᒋᔪᓐᓇᖅᐸᓯ ᐱᓕᕆᓂᖏᑦ ᓇᐃᓈᖅᓯᒪᓚᐅᕐᓗᒋᑦ ᕿᑐᕐᖓᐃ ᐱᓕᕆᐊᑦᓯᓐᓄᑦ ᓱᖏᐅᑎᑦᑎᐊᕈᓐᓇᖁᓪᓗᒍ. ᐃᖅᑲᐅᒪᖃᑦᑕᕆᑦ, ᐱᓕᒻᒪᒃᓴᖃᑦᑕᕐᓂᖅ ᓇᐃᑦᑑᑎᓂᒃ ᐱᐅᓂᖅᓴᐅᕗᑦ ᐱᓕᕆᕕᒡᔪᐊᕐᓂᕐᒥᒃ ᐊᑕᐅᑦᑎᒃᑯᐊᓗᒃ. ᐋᖅᑭᒋᐊᖅᓯᔭᕆᐊᖃᕌᖓᕕᑦ ᐋᖅᑭᒋᐊᖅᓯᕙᒡᓗᑎᒃ ᐃᓕᑦᓯᓐᓄᑦ ᐱᐅᓛᖑᒐᔭᖅᑐᓄᑦ.

ᐅᓪᓗᑕᒫᑦ ᐃᖅᑲᐃᓕᓴᖃᑦᑕᕐᓂᖅ ᐱᐅᕗᖅ ᐃᓅᑦᑎᐊᕐᓂᕐᒧᑦ. ᑕᓯᓴᖅᐸᒡᓗᓯ, ᕿᑲᐃᓐᓈᓗᙱᓪᓗᓯ, ᐊᒻᒪ ᐃᓪᓗᒥ ᓯᓚᒥᓗ ᐱᙳᐊᖃᑎᒌᒃᐸᒡᓗᓯ. ᑕᒪᓐᓇ ᐃᑲᔫᑎᖃᖅᐳᖅ ᕿᑐᕐᖓᕕᒃ ᐱᔪᒪᑦᑎᐊᕐᓂᖓᓄᑦ ᐊᒻᒪᓗ ᐃᓅᓯᖃᑦᑎᐊᕐᓂᖓᓄᑦ.

ᐅᓪᓗᑕᒫᑦ ᐱᓕᕆᐊᕆᕙᒃᑕᓯ ᐃᓕᓐᓂᐊᕈᑕᐅᔪᓐᓇᖅᐳᑦ. ᓈᓴᐅᓯᕆᓂᕐᒥᒃ ᐃᓕᓐᓂᐊᕈᓐᓇᖅᐳᓯ ᓂᖅᑎᐅᕐᓗᓯ, ᑎᑎᕋᕆᐅᖅᓴᓂᕐᒥᒃ ᐃᓕᓐᓂᐊᕈᓐᓇᖅᐳᓯ ᓱᓇᒃᑯᑖᑦ ᓇᓗᓇᐃᒃᑯᑕᓕᐅᕐᓗᒋᑦ, ᐊᒻᒪᓗ ᐃᓄᐃᑦ ᐱᖅᑯᓯᖏᓐᓂᒃ ᐃᓕᓐᓂᐊᕈᓐᓇᐳᓯ ᒪᑯᓂᖓ ᒥᖅᓱᕐᓂᕐᒥᒃ, ᓴᐸᖓᓕᕆᓂᕐᒥᒃ, ᕿᓚᐅᔾᔭᕐᓂᕐᒥᒃ, ᖃᒧᑎᓕᐅᕐᓂᕐᒥᒃ, ᐃᓄᐃᑦ ᓂᕿᖏᓐᓂᒃ ᓂᖅᑎᐅᕈᓐᓇᐳᓯ. ᑕᐃᒫᒃ ᐊᑑᑎᓕᖕᓂᒃ ᐱᓕᒻᒪᒃᓴᕈᓐᓇᖅᐳᓯ, ᐃᓱᒪᒃᓴᖅᓯᐅᕈᑎᒋᔪᓐᓇᖅᑕᖏᓐᓂᒃ, ᐊᒻᒪᓗ ᖃᓄᖅᑑᕈᓐᓇᕐᓂᕐᒥᒃ.

ᐃᓕᓐᓂᐊᕐᓂᖅ ᑐᐊᕕᐅᑎᔭᒃᓴᐅᙱᓚᖅ. ᕿᑐᕐᖓᐃ ᑲᔪᖏᖅᓴᑦᑎᐊᖅᐸᒡᓗᒍ ᐱᓕᕆᑎᓪᓗᒍ. ᐅᐱᒋᕙᒡᓗᒋᑦ ᐱᑦᑎᐊᖅᑕᖏᑦ, ᐃᓕᓴᕆᕙᒡᓗᒋᑦ ᐱᔪᓐᓇᖅᓯᕙᓪᓕᐊᔭᖏᑦ, ᐊᒻᒪᓗ ᑕᒻᒪᖅᑕᖏᑦ ᐃᓕᓐᓂᐊᕈᑎᒋᕙᒡᓗᓯᐅᒃ. ᐱᔭᕐᓂᙱᓐᓂᖅᓴᓅᖅᐸᓪᓕᐊᓗᓯ ᐱᔭᕐᓂᖅᑐᒦᙶᕐᓗᓯ. ᐃᑲᔪᕐᓂᖃᖅᐳᑎᑦ ᕿᑐᕐᖓᕕᑦ ᐱᔪᒪᑦᑎᐊᖏᓐᓇᕐᓂᖓᓄᑦ, ᓇᓗᖅᑯᑎᙱᓐᓂᖓᓄᑦ, ᐊᒻᒪᓗ ᐱᓕᕆᐊᖏᓐᓂᒃ ᓯᕗᒧᑉᐸᓪᓕᐊᑦᑎᐊᕈᓐᓇᕐᓂᖓᓄᑦ.

ᐊᒃᓱᕈᕐᓇᕆᒍᕕᐅᒃ ᐊᖏᕐᕋᒥ ᐃᓕᓐᓂᐊᖅᑎᑦᑎᓂᖅ ᕿᑐᕐᖓᕐᓂᒃ, ᑐᑭᓯᒋᐊᕐᕕᒋᕙᒡᓗᒋᑦ ᐃᓕᓴᐃᔨᑦ, ᐱᖃᓐᓇᕆᔭᑎᑦ, ᐅᕝᕙᓘᓐᓃᑦ ᐃᓚᒋᔭᑎᑦ ᐅᖃᐅᔾᔨᒋᐊᕈᓐᓇᖅᑐᑦ. ᐊᐱᖅᓱᖅᐸᒡᓗᑎᑦ ᑭᓱᓂᒃ ᐃᓕᓐᓂᐊᕐᒪᖔᑦ ᕿᑐᕐᖓᐃᑦ ᐃᓕᓐᓂᐊᕐᕕᖕᒥ ᐊᒻᒪᓗ ᑖᒃᑯᐊ ᒪᓕᒡᓗᒋᑦ ᐱᓕᒻᒪᒃᓴᖃᑦᑕᕈᓐᓇᖅᐳᓯ. ᐃᓱᒪᒃᓴᖅᓯᐅᕈᓐᓇᖅᐳᓯ ᐃᓕᓐᓂᐊᖃᑎᒌᖕᓂᕐᒥᒃ ᐱᖃᓐᓇᕆᔭᓯᓐᓂᒃ, ᐃᓚᑦᓯᓐᓂᒃ, ᐊᒻᒪᓗ ᕿᑐᕐᖓᕕᑦ ᐃᓕᓐᓂᐊᖃᑎᖏᓐᓂᒃ.