ᐅᖃᓕᒫᕆᐅᖅᓴᔾᔪᑎᑦ
ᕿᓂᕐᓂᖅ ᐅᖃᓕᒫᕆᐅᖅᓴᔾᔪᑎᒃᓴᓂᒃ
“ᓈᒻᒪᑦᑎᐊᖅᑐᑦ” ᐅᖃᓕᒫᒐᑦ ᒪᑯᐊᖑᕗᑦ ᕿᑐᕐᖓᕕᑦ ᐃᒻᒥᓂᒃ ᐅᖃᓕᒫᕆᐅᖅᓴᔾᔪᑎᒋᔪᓐᓇᖅᑕᖏᑦ ᐱᔭᕐᓂᓗᐊᙱᑦᑐᑦ ᐱᔭᕆᐊᑐᓗᐊᙱᑦᑐᑦ. ᓂᕈᐊᕋᓱᒃᐸᒡᓗᑎᑦ ᕿᑐᕐᖓᕕᑦ ᐱᓇᓱᒍᓐᓇᖅᑕᖏᓐᓂᒃ. ᐅᖃᓕᒫᒐᑦ ᐅᓂᒃᑳᖃᕆᐊᖃᖅᐳᖅ ᐅᖃᐅᓯᕐᓂᒃ ᕿᑐᕐᖓᕕᑦ ᐃᓕᓴᕆᔪᓐᓇᖅᑕᖏᓐᓂᒃ, ᐱᕕᒃᓴᖃᖅᑎᓪᓗᒍᓗ ᐅᖃᐅᓯᕐᓂᒃ ᐅᖃᓕᒫᕆᐅᖅᓴᐅᑎᒋᓗᓂᒋᑦ ᐊᒻᒪᓗ ᑎᑎᖅᑐᒐᖅᓯᒪᓂᖏᓐᓄᑦ ᑐᑭᓯᓇᓱᒍᓐᓇᖅᑕᖏᓐᓂᒃ. ᐱᒻᒪᕆᐅᕗᖅ, ᐅᖃᓕᒫᕆᐅᖅᓴᐅᑎᒋᔭᖏᑦ ᐱᔪᒪᑦᑎᐊᕐᓗᓂᒋᑦ ᐃᓱᒪᓕᐅᕈᑎᒋᔪᓐᓇᕐᓗᓂᒋᑦ!
ᓂᐱᖃᕐᓗᓯ ᐅᖃᓕᒫᖃᑎᒌᒃᐸᒡᓗᓯ
ᐅᖃᓕᒫᖃᑎᒌᖃᑦᑕᕐᓂᖅ ᕿᑐᕐᖓᕐᓄᑦ ᐅᖃᓕᒫᕆᐅᖅᓴᔾᔪᑕᐅᕗᖅ ᑐᓵᙳᐊᕐᓂᒃᑯᑦ. ᑐᑭᓯᐅᒪᓕᕈᑕᐅᒋᕗᖅᑕᐅᖅ ᖃᓄᖅ ᐅᖃᐅᓯᑦ ᑎᑎᖅᑲᒃᑯᑦ ᓂᐱᖏᓐᓂᒃ ᒪᓕᖕᒪᖔᑕ ᐅᖃᕆᐅᖅᓴᔾᔪᑎᑦᑎᐊᕙᐅᕗᕐᓗ.
ᐅᖃᓕᒫᓕᖅᑭᑦᑕᕐᓂᖅ ᐅᖃᓕᒫᒐᕐᓂᒃ ᑖᒃᑯᓂᖓᑦᓴᐃᓐᓇᖅ
ᐅᖃᓕᒫᓕᖅᑭᑦᑕᕐᓂᖅ ᑖᒃᑯᓂᖓᑦᓴᐃᓐᓇᖅ ᐅᖃᓕᒫᒐᕐᓂᒃ ᐃᑲᔫᑎᖃᖅᐳᖅ ᕿᑐᕐᖓᕕᑦ ᐅᖃᕈᓐᓇᖅᓯᕙᓪᓕᐊᓂᖓᓄᑦ, ᑲᑦᑐᖅᑕᕈᓐᓃᕐᓂᕐᒥᒃ ᐅᖃᓕᒫᕐᓗᓂ, ᐊᒻᒪᓗ ᐅᖃᓕᒫᕐᓂᐅᕗᖅ ᕿᑐᕐᖓᕕᑦ ᐃᓕᓴᕆᔪᓐᓇᖅᑕᖏᓐᓂᒃ.
ᑎᑎᖅᑲᑦ ᓂᐱᖏᓐᓂᒃ ᖃᓂᐅᔮᖅᐸᐃᓂᒡᓗ ᕿᒥᕐᕈᓇᖃᑦᑕᕐᓂᖅ
ᕿᑐᕐᖓᐃᑦ ᐅᖃᓕᒫᕆᐅᖅᓴᑎᒍᓐᓇᖅᐸᑦ ᐃᓄᒃᑎᑐᑦ ᑎᑎᖅᑲᓂᒃ ᐱᙳᐊᕐᓂᒃᑯᑦ. ᐅᖃᐅᓯᑦ ᐅᖃᓕᒫᖅᑕᓯ ᐊᒡᒍᖅᑐᕈᓐᓇᖅᐸᑎᑦ, ᐃᙱᐅᑎᖃᕈᓐᓇᖅᐳᓯᓗ ᖃᓂᐅᔮᖅᐸᐃᓂᒃ, ᐊᒻᒪᓗ ᐱᓯᐊᕐᓂᒃᑯᑦ ᑎᑎᖅᑭᕆᒍᓐᓇᖅᐳᓯ. ᑎᑎᖅᑲᑦ ᓂᐱᖏᓐᓂᒃ ᕿᒥᕐᕈᓇᖃᑦᑕᕐᓂᖅ ᐱᕚᓪᓕᕈᑕᐅᔪᓐᓇᖅᐳᑦ ᐅᖃᓕᒫᕆᐅᖅᓴᔪᓄᑦ.
ᑐᐊᕕᐅᔾᔨᙱᓪᓗᑎᑦ ᐃᓕᓴᕆᕙᒡᓗᒋᓪᓗ ᐱᔪᓐᓇᖅᓯᕙᓪᓕᐊᔭᖏᑦ
ᐅᖃᓕᒫᕆᐅᖅᓴᓂᖅ ᐱᓕᒻᒪᒃᓴᕆᐊᖃᖅᐳᖅ, ᐊᒻᒪᓗ ᓱᕈᓯᑦ ᐅᖃᓕᒫᕈᓐᓇᖅᓯᕙᓪᓕᐊᓂᖏᑕ ᓱᒃᑲᓂᖏᑦ ᐊᔾᔨᒌᙱᓚᑦ. ᐃᓕᓴᕆᕙᒡᓗᒋᑦ ᐱᔪᓐᓇᖅᓯᕙᓪᓕᐊᓂᖏᑦ ᐊᒻᒪ ᑕᒻᒪᓕᕌᖓᑕ ᑕᒪᓐᓇ ᐃᓕᓐᓂᐊᕈᑎᒋᕙᒡᓗᓯᐅᒃ. ᑕᐃᒫᒃ ᕿᑐᕐᖓᐃᑦ ᐃᒻᒥᓂᒃ ᐱᒃᑯᒋᓕᖅᐸᓪᓕᐊᓂᐊᖅᐳᖅ ᐅᖃᓕᒫᕈᓐᓇᖅᓯᕙᓪᓕᐊᓂᖓᓂᒃ ᐱᔪᒪᓕᕈᑎᒋᒃᑲᓐᓂᕐᓂᐊᖅᐸᐃᓪᓗ.
ᑎᒃᑯᐊᖅᑐᖅᐸᓪᓕᐊᕙᒡᓗᑎᑦ ᐅᖃᓕᒫᖅᑕᑦᓯᓐᓂᒃ
ᑎᑭᕐᓄᑦ ᑎᒃᑯᐊᖅᓯᔾᔪᑎᒧᓪᓘᓐᓃᑦ ᐅᖃᓕᒫᖅᐸᓪᓕᐊᔭᓯ ᑎᒃᑯᐊᖅᑐᕈᓐᓇᖅᐸᑎᑦ. ᑕᐃᒪᐃᓕᐅᖅᐸᒡᓗᓂ ᕿᑐᕐᖓᕐᓄᑦ ᑐᑭᓯᓕᕈᑕᐅᔪᓐᓇᖅᐳᖅ ᑎᑎᖅᑲᑦ ᐅᖃᓕᒫᖅᑕᐅᓲᖑᓂᖏᓐᓂᒃ ᓴᐅᒥᖕᒥᑦ ᑕᓕᖅᐱᖕᒧᑦ. ᑎᑎᖅᑲᑦ ᓂᓪᓕᐅᑎᖏᓐᓂᒃ ᐱᓕᒻᒪᒃᓴᕈᓐᓇᖅᐳᖅ, ᓈᓃᓪᓗ ᐃᓚᓕᐅᑎᓂᖏᓐᓂᒃ, ᐊᒻᒪᓗ ᐃᓕᓴᖅᓯᔪᓐᓇᖅᓯᔪᓐᓇᖅᐳᖅ ᐅᖃᐅᓯᑦ ᑎᑎᕋᖅᓯᒪᔪᑦ ᐱᒋᐊᕐᓂᖏᓐᓂᒃ, ᕿᑎᐊᓃᑦᑐᓂᒃ, ᐊᒻᒪᓗ ᓈᓂᖏᓐᓂᒃ. ᕿᑐᕐᖓᐃᑦ ᐅᖃᓕᒫᑦᑎᐊᖏᑦᑕᕌᖓᑦ, ᓴᐃᓕᑦᑎᐊᕐᓗᑎᑦ ᑕᒻᒪᖅᑕᖓ ᐅᖃᑦᑎᐊᕈᓐᓇᖅᐸᑦ ᐊᒻᒪᓗ ᐱᒋᐊᕐᓂᖓᓂᑦ ᐅᖃᐅᓯᐅᑉ ᐱᒋᐊᒃᑲᓐᓂᕐᓗᓯ ᑎᑎᖅᑲᑦ ᑎᒃᑯᐊᖅᑐᖅᐸᓪᓕᐊᓗᒋᑦ. ᑕᐃᒫᒃ ᐃᓕᑉᐸᓪᓕᐊᔪᓐᓇᖅᐳᖅ ᓴᐱᓕᖅᑕᙱᓪᓗᓂ.
ᐊᐱᖅᓱᖃᑦᑕᕐᓂᖅ
ᐅᖃᓕᒫᖃᑎᒌᖕᓂᐊᕐᓗᓯ, ᐅᖃᓕᒫᖃᑎᒌᒡᓗᓯ, ᐊᒻᒪᓗ ᐅᖃᓕᒫᕇᕈᔅᓯ ᕿᑐᕐᖓᐃᑦ ᐊᐱᖅᓱᖃᑦᑕᕈᒃ ᐅᓂᒃᑳᖑᔪᓂᒃ ᐃᓄᖏᓐᓂᒡᓗ. ᐊᐱᖅᓱᖃᑦᑕᕐᓗᒋᑦ ᓇᒻᒥᓂᖅ ᐊᑐᓚᐅᖅᓯᒪᔭᖏᓐᓂᒃ ᐃᓕᓴᖅᓯᖕᒪᖔᑦ ᐅᕝᕙᓗ ᓄᖅᑲᑲᐃᓐᓇᕐᓗᓯ ᐅᖃᓕᒫᕇᓚᐅᙱᓐᓂᑦᓯᓐᓂ ᓇᓚᐅᑦᑖᖁᓗᒍ ᖃᓄᐃᓕᓂᐊᓕᕐᒪᖔᑕ ᐅᖃᓕᒫᖅᑕᓯ ᒪᓕᒡᓗᒋᑦ. ᑕᐃᒫᒃ ᕿᑐᕐᖓᕕᑦ ᑐᑭᓯᐅᒪᑦᑎᐊᓕᕈᓐᓇᕐᒪᒋᑦ
ᐅᖃᓕᒫᖃᑦᑕᕐᓂᕐᒥᒃ ᐊᔪᕆᖅᓯᐅᔾᔨᓂᖅ
ᐅᓪᓗᑕᒫᑦ ᕿᑐᕐᖓᐃᑦ ᐅᖃᓕᒫᖃᑎᒋᕙᒍᒃ. ᐅᖃᓕᒫᕈᔾᔭᐅᒍᕕᑦ ᕿᑐᕐᖓᓐᓄᑦ ᐅᖃᓪᓚᖃᑎᒌᖕᓂᒃᑯᓪᓘᓐᓃᑦ ᐅᓂᒃᑳᖑᔪᓂᒃ ᑐᑭᓯᕙᓪᓕᐊᓂᖅ, ᑕᒪᒃᑯᐊ ᐱᐅᕗᑦ. ᐊᔪᕆᖅᓯᐅᔾᔨᖃᑦᑕᕐᓂᖅ ᐅᖃᓕᒫᕈᒪᓂᕐᒥᒃ ᕿᑐᕐᖓᓐᓄᑦ ᑐᑭᓯᐅᒪᓕᕈᑕᐅᕙᓪᓕᐊᕗᑦ ᐅᓂᒃᑳᑦ ᐱᐅᓂᖏᓐᓂᒃ ᐊᒻᒪᓗ ᑲᔪᓯᐊᑦᑎᐊᕈᓐᓇᖅᑐᒥᒃ ᐅᖃᓕᒫᖃᑦᑕᕐᓂᕐᒧᑦ.