Taiguarnirmut Ikajuutit
Pilutit ihuaqtunik taiguakhanik
“Ihuaqtuq” taiguagakhaq nutaraqqit inminik taiguaqtaaqtaa ajurnalluanngittuq ajurnailluanngiturluunniit. Pilutit taiguakhanik ihuarijainik ajuiqhautigijainik. Tainiiqaqtukhaq taininik nutaraqqit ilihimaliqtainnik, imaa inmingnik uukturlutik taiqqautait taiqqarlugit imaalu piksait ikajuutaujut titirait taiqqariangita. Ikpingnaqturlu, taiguagakhaq aliagijakhaa imaalu ihumapkatillugulu!
Nipiqqutulutik taiguaqatigiiglutik
Nipiqqutulutik taiguarniq ikajuutaujuq nutararnut tuhaajaangit nipiit tainiit. Aahiittauq takuurutaujuq qanuqtut titirariakhaa tainiit aadjikkuhiqhugu taigaangat tainiit ikajuqhugillu uqauhinik.
Taigurlugu atauhiq taiguagakhaq amigaiqturlugu
Taiguaqatigilugu nutarat taamna atauhiq taiguagakhaq tainiit ilitturijaangita, qanurinaruiriangat, aliagivalirlugu taiguariamini, ilitariinavalirlugit taiguangit.
Naunairniarlugit nipait titirniillu
Ikajurlugit nutarat ilittiariangita Inuktut nipingit alianaqtukkut uukturlutik. Avikturlugit tainiit naiglilugit, atuujautiliurutigilugit titirniit, imaalu ulapqiqatigilugu Inuktut titirauhiinik. Naunaiqhigaangat ihuarutaujuq taiguajukhijaangat.
Amigaqhutailutit takuurlutit ajuidjuhikhaanut
Taiguajukhijaami uuktuqattarialik, tamaita nutaqqat atauttikkut ajuilimaittut inmik uukturaalutik kihimi. Nakugivaglugit pijukhigaangat imaalu ihuinaarutiit ajuidjutaulutik. Imaatut nutarat inminik nakuuhungniaqtuq taiguqatarumapkautaujullu.
Tikkuarlugu tainiit taiguqhutit
Tikkuaqtarlugit hunamulluunniit tikkuarutiqarlutit tikuaqtaringita tainiit taiguqhutit. Imaa ikajurniaqtaa nutarat takugiangita tainiit uqauhiqautillu taiguqtauvaktut haumingmit taliqpingmut. Ikajuutaujuq taininik aviktuigiangita nipait, katimajuk, ilitarijukhilugillu hivulliujut, qitqaniittut, kingulliujullu nipait. Nutarat ihuittumik taikpagu tainiq, uqarlugu ihuaqtuq tainiq taiffaaqulugu tikkuaqtaqhugit taiguaqhuni. Imaa ikajurniaqtaa nutaanik tainirnik ajuiqharluni inmi qaurunaaqhimaittumik.
Apiqhuqpaglugu
Nutqaqpaglutit taiguakhutit, taigualiqhutit, taiguaq iniqqat apirijaarni nutarat taiguamiitutigut humiittaakhaillu. Apirilugit inmingnut hulidjutimingnut atapkarlugit imaaluunniit nutqarlutit iniqqat taiguaq imaalu ihumapkarlugit hujaakhait taiguaqtamigni. Imaa ikajuutaujuq nutaraq kangiqhittiajaakhaa unipkaamik ihumagijuummirlugillu.
Tuhaapkarlugu ihuaqtumik taiguarnirmik
Ubluq tamaat taiguaqatigivakglugu nutarat. Imaalu nutarat ilingnut taiguaqqat imaaluunniit nanihijutik unipkaaq kangiqhijaa uqariblugu, imaa ikpinganaqtuq. Takupkautit quviahungnia taiguaraangami ikajuutaujuq nutararnut ilitturijaangat alianaqtuq taiguaq taiguariami nungulaittuq.